قصائد ليوم العباس ع

بسم الله الرحمـن الرحيم


--------- المستهل


يادهر -- بالگمر -- صوبتني

من وگع -- عالنهر -- روعتني

خدري سلبته -- صبري هدمته

--------------------

يادهر انه العقيله بت علي والزهره امي

ماشفت لحضه ابحياتي راحه ما فارگني همي

امي عافتني يتيمه وراح ابويه الچان يمي

والحسن بعيوني شفته بالطشت دم چبده مرمي

شحملت -- وصبرت -- عا لمآسي

امن الزغر -- شيبن -- حتى راسي

بعد الصبرته -- صبري هدمته

-------------------------

كبرت الام السنين ويكبر ابروحي حزنها

وظلت اعيون ودمعها امن البچي ينزف جفنها

لاچن آمالي بخوتي هانت اعليه محنها

اربعه امن ام البنين وللوفه ربه حظنها

اخوتي -- هيبتي اربعتهم

بالشدد -- بالمحن -- جربتهم

هذا الخسرته -- صبري هدمته

--------------------------

اخوه عندي من ابويه اربعه والحره امهم

اثلث كواكب مامثلهم اعليهم امچلچل گمرهم

همه رفعت راس اليه واليهم زينب يهمهم

ماچنت ادري اشاهد بالمصارع يجري دمهم

چن تهت -- من شفت -- ضيعوني

حشمت -- واعتبت -- من نسوني

راح الذخرته -- صبري هدمته

----------------------------------

چانوا اشلون اخوه عندي وياهو اخوه مثلي عدها

وياهو مثل امهم اصيله عالوفه اتربي ولدها

وصته العباس اخويه بيه ويضحي وعدها

وشفرت الصارم يگلها ابدم مناحرهم احدها

بالغدر -- تنطبر -- هامته

والسهم -- بالنظر -- رميته

انهض ندهته -- صبري هدمته

-----------------------

انهض لاختك ندهته للحزن والهم عفتني

لاتظل نايم يخويه ابشيمتك ونته الجبتني

گتلي عد عينچ يزينب انه بحماك اوعدتني

وتالي مابين النوايب والمصاعب ضيعتني

هالعمر -- يابدر -- ما اريده

هاالدمع -- للگلب -- وشيفيده

گلبي كسرته -- صبري هدمته

-----------------------

گلبي مكسور اشيجبره وهاجت احزاني عليه

من ابو فاضل فگدته بالوسف اصفگ بديه

لاجت الروح اعله فگده الشوفته عيني ربيه

اخته ويهمني وجوده واخذته مني المنيه

ودعت -- ضيعت -- عزتي

بالجفن -- جرَحت -- دمعتي

من مرمي شفته -- صبري هدمته

-----------------------

ابوذيات
-------

الگلب عگب الگمر ياناس منراح

كفيلي وچنت اخاف اعليه منراح

بعد شيفيد اصفگ راح من راح

وابو فاضل مشه وميعود اليه

---------------

شعجب عباس راح وبعد مايه

صحت ارجع وخلي النهر مايه

لون لاختك يصح اولاد مايه

يفدوك وترد سالم اليه

----------------

وحگ عودچ المثله ابد ماعود

يزينب لعد هذا اليوم ماعود

لچني لورحت للماي ماعود

تعذريني تطيح اچفوف اديه

--------------------


المستهل

-------- طريقة مكسورة خاطر جيتك


وينك يالكافل ضعني -- ناديت وماتسمعني

--------------------

عباس اختك بالحيره -- امصيبتها والله اچبيره

ترضاها يابو الغيره -- بين اجناب اتضيعني

----------------------

عباس اختك مفجوعه -- حملت ياشوغه وروعه

حسين امكسرات اضلوعه -- ونحره الينزف روعني

---------------------------

عباس او شوف اشبيه -- والاثر شنهو اعليه

آه الطف وشاطيه -- مرَ الظيم ايجرعني

-----------------------

من طاحت خويه الرايه -- مارحمت بيه اعدايه

لوتدري يبن الآيه -- عدوانك شتسمعني

-----------------------

اشتتصور خويه اعيالك -- بيها يرحم چتالك

سلبها وداس اطفالك -- هذا الشفته ايجزعني

----------------------

عباس الهم اشكبره -- ياشاب اعيوني اتنظره

مگطوع او ينزف نحره -- وعبد الله اللي يفجعني

---------------------

عباس او حشه اليله -- تتراجف كل العيله

دمع الاحزان اتسيله -- وانته ابغفله اتودعني

---------------


نسالكم الدعاء